مقاله ای پیرامون 21 آذر

آذربايجان ميللتينين پيشه‌وري دورونده
Urmu
آذربايجان ميللتينين پيشه‌وري دورونده
تاريخي فاكتالار آيدينجا گؤستريركي، ايراندا چوخلو ايل‌لر بويو، توركلر ياشاييب و ياشاماقداديلار و يئنه‌ده تاريخ باخيميندان، ايراندا سياسي حاكميتيتن چوخ دؤرلري توركلرله اولوب و يا بونلار حاكيميتده ايشتيراك ائديبلر و بئله بير وضعيت تا 1920 – نجي ايلينه‌دك دوام تاميشدير.
آمما دئمك اولار ايراندا، پهلوي سولاله‌سي‌نين حاكيميتي، اينگيليز حمايه واسطيه سيله 1299 گونش ايليندن باشلاناراق، ايران توركلري سياسي – كولتور باخيميندان چتينليكلره دوشموشلر. نييه كي، رضاخان، قاجار تورك سولاله‌سينين اساس حاكيمييه‌تيني اينگليزين آشكار حيمايه‌سي ايله بير قارا كودتا ايله لخله‌تدي و سونرا رضاخان قوردغو و قوندورما سئچيلميش مجليس شورا وكيل‌لري توسوطيه ايله احمد شاهي، شاهليقدان خلع ائديب و ايرانين تاج و تاختين اله گيردي و قاجار تورك حاكميتينه سون قوياراق يئرينه ايراندا بير ايرتيجاعي، ديكتاتورلوق ائدن و شوونيست حاكميت قوردو.
او چاغدا بعضي اينگيليزه باغلي قلمچي‌لر، بو شرايطين اوز مئرمه‌يين چوخ آلقيشلاييرديلار و حمايه ائديرديلر و اؤز قازئتلرينده، فارس حاكمييتين يارانماغين اؤزلرينه پارلاق گله‌جك گؤروردولر و بئله يازيرديلار :
«احمد شاهي خلع ائتمكدن مقصد، بونا خاطير دئييل كي، ايراندا حاكمييت سيستمي شاهليقدان جمهوريته ساري گئتسين، چوخ – چوخ نعوذبالله – بلكه قاجار قولدورو تورك طايفاسينسن يئرينه نجيب و آري تميز پهلوي سولاله‌سي اوتروسون.» (1)
پهلوي شاهليغي ايراندا قورولاندان سونرا بو سيستم طرفيندن فارسلاردان باشقا ائللره و خصوصاً آذربايجانين تورك ميللتينه چوخ چتين توتولدو.
اونلار اؤز هدفلرينه نايل اولماق اوچون بير پارتيا «پان ايرانيست» آديلا قورولوب و بعضي ضياليلاري اؤزلرينه طرف چكيب و آيري طرفده‌ن ده، خارجي تاريخچي يازيچي‌لارين قلم‌لريني نفت دولارلاري ايله آليب و اونلارين واسيطه‌‌سيله غير علمي حالدا، يئني‌دن ايرانين تاريخين يازماغا باشلاديلار و اونلار چوخ چاليشيرديلار ايران تاريخينده آرياييي آپارتايدليق ايده و فيكيرلري گئنيش حالدا ياييديريلسين و اونون كناريندادا تورك و توركمن و باشقا ائللري تجاووزكار و مدنت‌دن اوزاق قلمه گتيريلسين و نهايت، بير پارا ايقداملارايله ايراندا اولان توركو و باشقا ديللري زامان بويو آرادان قالديريب و يالنيز فارس ديلي باشقا ديللره قاليب اولسون و قالسين.
اونلار بو ظاليمانه سياسيتي ايزله‌مك و قاباغا آپارماق اوچون، چوخلو مادي و معنوي تشبوثلارا اب ووردولار و بو يولدا آمانسيز و گوجلو ايشله‌ديلر، او جومله‌دن قددار و ظولمكار والي‌لر، پهلوي حاكمييت طرفيندن آذربايجانا گؤندريليردي و اونلار آذربايجاني تكجه ايرانين موستعميره‌سي يبلديلر و توركو ديلينده دانيشماغي مكتبلره ياشاق ائتميشديلر.
بو جور چوخلو شوونيستي سياست‌لر آپارماغين نتيجه‌سي او اولدوكي، توركلري سياسي حاكميت‌دن كنارا قويماقدان علاوه، آذربايجانين سوسيال و اقتصادياتي چوخلو زيان گؤرسون و كولتور و ادبيات باخيميندان، توركو ديلي گون به گون اؤز اؤنميني الدن وئرسين، نييه كي، پهلوي سيستيمي توركو ديلينده يازيب و ياراتماغي قاداغان ائتميشدير و بو يولدا خيلي تورك يازيچي‌، شاعير و ضيالي‌لاري توتوب اؤلدوروب، ديدرگين اتئديب و يا دوستاغا سالميشدير.
ايران توركلري ضدينه اولاراق آسيميلاسيون سياستي گوجلو و جيددي شكيللرده كولتور و ادبيات و ديل عرصه‌سينده، قاباغا آپاريليردي بو گرگين دوروم ايران توركلريني موجاديله‌يه ساري هده‌له‌ييردي.
ميرجعفر پيشه‌وري بو دورومون قارشي‌سيندا دورانلاردان بيريسيدير. او اؤز اينقيلابي فيكير و دوشونجه‌سينده‌ن مودافيعه ائتمك ايچون 1930 نجو ايلده ياخالانيب و 11 ايل رضاخان دوستاغين تحمل ائتدي.
ميرجعفر پيشه‌وري سوسيال دئموكرات ايده‌لريني ايزله‌ييردي، اونون مفكوره‌سينده ميللي حيسسلر 1941 دن سونرا آرتيق چيچكلنميشدي و پيشه‌وري او زامانلار، آذربايجانين اوزوندن ظولم و تجاوزكارليق توزون سيلمك اوچون، بير پارا مقاله لر چئشيتلي قازئتلرده يازماغا باشلادي.
دئمك اولار 1941 ينجي ايلدن بري رضا شاه ايراندان قاچقين اولان زاماندان، آذربايجاندا، ميللي فعاليت‌لر ايشيق اوزو، گؤرموشدو و قازئتلر تبريز، اردبيل و اورمودا توركو ديلينده يايليب و يا تئاترلار صحنه‌يه چيخميشدي.
ميرجعفر پيشه‌وري 1944 نجو ايلده ايرانين ميللي شورا مجليسين 14 نجو دوره‌سينه آداي اولوب و يوخاري سس‌له تبريز جماعتي طرفيندن وكيل سئچدي لاكين يئني تخته و قودرته چاتان محمدرضا شاه پهلوي و اونون درباري و فيكيرداشلاري، پيشه‌ورينين مجليسده اولماغين ايسته‌ميرديلر و بونا گؤره‌ده، اونون اعتيبارنامه‌سين رد ائتديلر.
پيشه‌وري موباريزه‌دن ال گؤتورمويوب و آذربايجانين دئموكرات پارتياسيني ياراتدي و 1945 نجي ايلينده بو پارتيانين ايلك قورولتايندا گوجلو سس له، اونون ليدر و صدري سئچيلدي.
پيشه‌وري 1945 نجي ايلده، آذربايجانين دئموكرات فرقه‌سينين قورولتايلارنين بيرينده اؤز فيكير و ايدياسيني بئله بيان ائتميشدير :
«بيز ايسته‌ييريك اؤزوموزون كونتورولون اؤز اليميزه آلاق. بيز آذربايجاني ايراندان آييريلماييب و تكجه سئويريك كي،اؤز داخلي ايشلريميزده آزاد و موختار اولاق.»
خاطيرلاماليريركي،او چاغلاردا آذربايجانين دئموكرات فرقه‌سينين پروقراملارين و دئموكرات گئديشلرين، بير پارا آزادليق سئور قازئتچيلر و آيري شخصيتلر تهراندا و ايرانين باشقا شهرلرينده آلقيشلاييب و حمايه ائديرديلر.
بئله ليكله 21 آذر نهضتي آذربايجاندا دوغولدو و آذربايجان ميللتي ايللر بويو رضاشاهي ظاليم رژيمي و محمدرضا پهلوي اونون اوغلوكي، تئزه تاخته يئتيشميشدي تاپدالانيرديلار، بو نهضه‌ته قاتيلديلار و آز زامان كئچه‌رك، بو نهضت، پيشه‌وري ليدرليگليه اوغورلاندي تا آذربايجاندا ميللي حيسسلر ديرچلسين و ميللي حؤكومت ياراتسين.
دئملي‌دير آذربايجانين ميللي حؤكومتي يارانان زامان روس سووئت قوه‌لري آذربايجانين ايشغال ائتميشديلر و روسلاردا بو حؤكومتي بير پارا عيللتلره گؤره حمايه ائديرديلر. نئجه كي، ايران حؤكومت و دولتين‌دن‌ده اينگيليز دولتي حمايه ائديردي. لاكين بو حؤكومتين يارانماسينين اصل عاميلي 20 ايليق رضاخان دورونون عدالتسيزليگ، ظولمكارليق، آذربايجانين ميللتيني حقارت آلتيندا ساخلاماق، ميللتي او گونكو بين‌الخالق دوروموندا، اؤز گله‌جك طالعيني قورماق ايسته‌ييردي.
پيشه‌وري بير ضيالي، مفكوره‌لي، گله‌جي گورن، اؤز آنا تورپاغي و ميللتين سئوون، بين‌الخالق سياست و دوروموندان آگاه و بيلجي اولان، خالقين ايستك‌لرينه باخان، بير سوسيال دئموكرات شخصيدي.
او خصوصي ماليكييه‌تي، اؤز يئرينده قدر و قيمتلنديردي، او بير ايليك حؤكومتينده دين و مذهب‌له قاريشي دورمادي.
بو حؤكومتين اساس ميللي ايسته‌كلري بو مادده‌لرده خولاصه اولوردو:
«1- ايرانين ايسيقلالين و بوتؤولويون ساخلاماقلا برابر، آذربايجان خالقينا داخلي آزادليق و مدني موختاريت وئريلمه‌ليديركي، اوزون مدنييت يولوندا و آذربايجانين آبادلاشميش، ترقي‌سي ايچون عموم اؤلكه‌نين عاديلانه قانونلاريني گؤزله‌مكله برابر اؤز طالعيني تعيين ائتسين.» [آذربايجانين مختصر تاريخي، آراز اوغلو]
آذربايجانين دئموكرات فرقه‌سينين ايكينجي مادده‌سينده، بيرينجي مادده ايجرا اولماسي ايچون ايالتي و ولايتي انجومنلرين تئزليكله ايشه باشلانماسي طلب اولوردو.
فرقه اوچونجو مادده‌سينده تورك ديلينده مكتبلرده درس آپارماغي طلب ائديردي.
آذربايجان ميللي حؤكومتي، بير ايل آذربايجاندا دوام ائتدي بو مددتده آذربايجان توركجه‌سينده مكتبلرده، درس وئريلدي، تبريزده يونيوئرسيته داير اولدو. قازئتلر توركو ديلينده شهر و كندلرده ياييلدي. شعر انجومن‌لري قورولدو، داستانلار يازيلدي. آذربايجان ديلينده تئاترلار صحنه‌يه چيخدي، آذربايجان موسيقي‌سي ديرچلدي. يوللار چكيليب و خاليصه دولتي يئرلر كندلر آراسيندا بؤلوندو و بير پارا، باشقا ايقداملار آپاريلدي و بونلارلا پارالل، ميللي حيسسلر ديچه‌ليردي و آذربايجان خالقي، تورك اولماغينا فخر ائديردي.
بو ميللي اويانيش،‌ميللي موجاديله‌يه آرتيق گوج وئريردي، پيشه‌وري و دئموكرات فرقه‌سي، آذربايجانلي تورك اولماغي مينمسيه رك «كيمليك» كيمي طرح ائديردي.
بونودا اونوتموياق كي، اينديكي جنوبي آذربايجاندادا ميللي و مدني چاليشمالارين كؤك و ريشه‌سي، پيشه‌وري حركاتي‌ندادير و اوندان ايلهام آلير.
پيشه‌وري حركاتي، شاه و اونون ساراينا باغلي اولان قلم ساتان تاريخچي طرفلريندن «تجزيه طلب» ،‌«كمونيست» ، «خرابكار» و باشقا عنوان‌لاريله قلمه گليب و تاپدالانيردي، لاكين او آذربايجاني ايراندان آيريلماق ايسته‌ميردي و تكجه ايسته‌ييردي كي، ايران چرچيوه سينده آذربايجان ميللتيندن علاوه، ايراندا ياشييان باشق خالقلاردا دئموكراسي و ميللي ايسته‌كلرينه چاتسينلار.
پيشه‌ورينين، شايد بؤيوك يانليش و اشتيباهي، روسلارين اؤز اصلي مقصدلريني گيزله‌ده‌رك، اؤزلرينه آزادليق سئوون، خالقيلاري قورتاران و آرخا دوران، زحمتكش فهله‌لره قورتولوش وعده‌سي وئره‌رن – نيقاب و ماسكي وورموشدولار و بو پوچ شوعارلاريله، باشقا اؤلكه‌لرده چوخلو سول پارتيالار يولا ساليب و سياسي آمانلارين ايزله‌ييرديلر و سونرالار بللي اولدوكي، بونلارين هاميسي تكجه روسيا امپرياسي قورماق اوچون و امپرياليستي آماجلارا يئتيشمك اوچون‌دور.
و بونا گؤره‌ييدي كي، ايرانين او زامان باش ناظيري اولان و دولت صدري احمد قوام لا سازيش ائديب و ايرانين شومال نفيتين امتيازين آلماقلا، آذربايجان ميللتينه و پيشه‌وري حركاتينا خيانت ائديب و حتي فدايي قوه‌لرين شاه آرتشي مقابيلينده دايانماق و موباريزه آپارماغا، مانع اولدولار و قويماديلار كي، آذربايجانين ميللي حؤكومتي،‌بوندان آرتيق ديرچلسين، چونكو بو حؤكومتين گوجلنمه‌سي سونرالار مومكونويدو، شومالداكي آذربايجان سووئت جومهوريتي‌ندن علاوه، باشقا سووئت جومهوريت‌لرينه‌ده، اؤز تاثيرين بوراخا و اولاردادا ميللي حيسسلر ايستيقلالارين اله گتيرمك ايچون گوجلنديره.
هر حالدا پيشه‌وري حركاتي 21 آذربايجان 1325 – اينجي ايلده، يعني بير ايل باش وئرندن سونرا، شاهين قددار ، دهشتلي و يامان گونلري آلدي و سيخينتيلار باشلاندي.
شاه بو حركاتا سون قويماق اوچون وحشيجه‌سينه 25 مين آذربايجانليني اؤلدوروب و اعدام ائتدي. 70 مين نفر ايرانين باشقا يئرلرينه و قونشو اؤلكه‌لره سورگون اولدوالار و نئچه مين عايله‌ده بو يولدا داغيلميشدي و يا آذربايجانين فدايي ايگيدلري صفر قهرمانيان تكين‌لر اعدامدان قورتولوب، 32 ايل شاهين دوستاقيندا ساخلاندي.
لاكين آذربايجاندا ميللي موجاديله اودو، بو قارا يئللرله سؤنمه‌دي و سؤنمويه‌جكدير، نييه كي :
«آمما ظن ائتمه‌كي، داغلار يئنه قالخان اولاجاقدير،
محشر اولماقدادير، بونلار داها وولكان اولاجاقدير،
ظولم دونياسي ياناركن او تيليت قان اولاجاقدير،
واي… نه طوفان اولاجاقدير.»
قايناقلار:
آذربايجان مختصر تاريخي، آراز اوغلو
شخصيت سيد جعفر پيشه‌وري در رهبري تشكيلات سياسي، حميد ملازاده، ارمغان آذربايجانين اؤزل سايي‌سي، 1383 نومره 60، سونونجو صحيفه
سندي از ظهور شوونيسم در ايران، علي رضا صرافي
خاطرات صفر قهرمانيان، علي اشرف درويشيان
21 آذر نئجه ياراندي؟ دوقتور محمدتقي زهتابي، ارمغان آذربايجانين اؤزل سايي‌سي، 1383، نومره 60.
گذشته چراغ راه آينده است، گروه نويسندگان جامي
پاورقي:
1- سندي در ظهور شوونيسم در ايران، علي رضا صرافي.