تاریخ یاخیندان واوزاقدان

تاريخ، ياخيندان و اوزاقدان
تاريخ، ياخيندان و اوزاقداندكتر محمد علي فرزانه
باكي سفرلرينده، هر دفعه اولدوغو كيمي، بو سون دفعه ده، يعني دده قوروقود سمپوزيومونون گئچيريلديگي گونلرده،آذربايجان جمهوريتي مؤلفلري طرفيندن قوناقلارا كيتابلار باغيشلاندي. ايلك صحيفه‌لرينده مؤلفلرين دوغماليق، قايغي، ايستي قانليليق و آلچاق كؤنوللولوك يازيلاري ايله سوسله‌نن (بزه‌نن) بودگرلي هديه‌لرده انسان، معنوي ـ مدني محبت و ايلگي‌نين درينليگيني دويور و شيرينليگيني تامسينير. منه باغيشلانان كيتابلار اونومده‌دير. بونلارين بير چوخو آذربايجانين ميللي استقلال و آزادليغيني الده ائتديگي، بايراقلار ايچينده بايراغي و ملتلر آراسيندا عنواني اولدوغو و توتاليتاريسم سلطه‌سيندن ياخا قورتارديغي ايللرده يازيلميشدير. هاميسيني بيردن اوخوماق، قورتوم ـ قورتوم اودماق ايسته‌ييرم. هاميسي نين ايچينده اوزمك ومرجانلار چيخارماق ايسته‌ييرم. هاميسيني بيرجه ـ بيرجه تانيماق وتانيتديرماق ايسته‌ييرم. لاكين گؤزلريم! … كيتابلارين بير چوخو هله ده كيريل الفباسي ايله چاپ ائديلير. ايللردن بري بو الفبايا آليشديغيم حالدا، ان چوخو ايگيرمي دقيقه، اونو دا گوج ـ بيللاه ايله اوخويا بيليرم. دوقتور آرديجيل اوخوماغي ياساق ائتميش، ان چوخو هر گون بير ساعات …
گؤزلريمي يومورام، اليمي اوزاديرام، هانسي كيتاب ايلك دفعه اليمه توخونسا اونو اوخوياجاغام. قالين كيتابلاردان بيري اليمه گئچير. گؤزلريمي آچيرام: ياشار قاريئف، تاريخ «ياخيندان و اوزاقدان». يئددي يوز صحيفه‌ليك بير كيتاب. لاكين، اوغورلار اولسون كي، اولدوقجا تميز، اوخوناقلي و ياراشيقلي بيچيمده چيخميشدير. كيتابين اوست قابيغيني آچيرام. جيلدين آستاري اوزه‌رينده بو سؤزلر وار: «هم ياخينلاريمين، هم اوزاقلاريمين ان مهرباني، عزيزي، اعتبارليسي … فرزانه معلمين كيتابخاناسينا كيچيك هديه».
يئرينه نقطه تاخديغيم سؤزلرين كرامتي مني اوتانديرير. مؤليف هميشه وهر يئرده اولدوغو كيمي يئنه ده مني قاباقلاميش، او، اؤزونون بويونا بيچيلميش و شانينه يارار سؤزلري تام كرامت و تواضعله منيم حقيمده ايشله‌دير. ائله اوسانديغيمين سببي ده همين بو.
پروفسور ياشار قارايف له اوز ـ اوزه گؤروشمه‌دن اول، اونون بديعي ـ تنقيدي يازيلاري وفلسفي ـ اجتماعي گؤروشلري ايله مطبوعات صحيفه‌لريندن و هاميدان چوخ اليمه چاتان «ادبي پروسئس» مجموعه سي نين تك ـ بير سايلاريندا تانيش اولموشدوم. ج . م . قليزاده ، م . جعفر، ك . طالب زاده، ق . قاسيم زاده، ع . مير احمدوف و ياشار قارايف كيمي تانينميش اديب، متفكير و تنقيدچيلرين مديريتي و امكداشليغي ايله اولدوقجا دولغون مندرجه و يوكسك اوسلوبلا چيخان بومجموعه‌لرده ياشار قارايئف ين اؤن سؤز عنواني ايله يازديغي علمي ـ تنقيدي باش مقاله‌لري منه بيلمه‌ديكلريمي اؤيرتمكده بؤيوك يارديم ائتميشدير. يئري گلميشكن دئييم كي، من آذربايجان علملر آكادمياسي آديله ايللر بوندان اول، داها دوغروسو 46 ـ 1945 ـنجي ايللردن تانيشام. بو آدي و اونون نه آنلام داشيديغيني دا او واختلار پروفسور جعفر خندان دان ائشيتميشم. او ايللرده ايران يازيچيلاري نين بيرينجي قورولتايينا گلن نماينده‌لردن بيري ده آكادميك محمدعارف داداش زاده ايدي. او قاييديشدا سووئت نماينده‌لري ايله بيرليكده تبريزه گلميشدي. من بو گليشي ائشيدنده جعفر خندان دان رجا ائتديم مومكون اولورسا مني اونونلا گؤروشدورسون و بو گؤروش باش توتدو. داورانيشي، وقاري و عيني حالدا ساده‌ليگي انساندا حؤرمت دوغوران معليمدن من ديله، ادبياتا، ميللي وارليغا و مدنيته عايد آردي ـ آراسي كسيلمز سورغولار سوروشدوم. اونون كؤنوللو و آلني آچيقليقلا وئرديگي ييغجام لاكين درين جاوابلارين چوخو هله ده ذهن آرشيويمده ياشايير. ايللر سونرااونون اثرلري نين اوچ جلدليك توپلوسونو الده ائتديم و بومجموعه هله ده بير قايناق اثر كيمي يئري گلينجه مني فايدالانديرير.
منيم داها سونراكي ايللرده علملر آكادمياسي نين خصوصيله نظامي آدينا ادبيات انستيتوتونون نشر ائتديگي كيتابلار و نشريه‌لردن آرابير الده ائتديگيمه باخماياراق،بو علم و مدنيت مركزي ايله ايلك عياني گؤروشوم داها سونرالار، يعني ايلك دفعه 1992 ـ نجي ايلده اولدو.
باكييا ايلك سفريمده زيارت ائتديگيم علم و مدنيت اوجاقلاريندان بيرينجسي آكادمي ايدي و اورادا داها ياخيندان تانيش اولدوغوم و قايناييب قاريشديغيم عاليملردن بيري بلكه‌ده بيرينجيسي ياشار قارايئف ايدي. من ايلك سفريمده و داها سونراكي سفرلريمده قارايئف ين معنوي ـ مدني شخصيتي ايله داها ياخيندان و عياني حالدا تانيش اولدوم. اونون گئنيش ساحه‌لي علمي ـ آناليتيك ياراديجيليق قدرتي، اورتايا چيخارديغي سانباللي ـ تنقيدي اثرلر و هاميدان اول بو بؤيوك عاليم و نظريه چيده اولان ادب ـ اركان، كمال، تواضعكارليق، ايش بيلرليك و سس‌سيز چاليشقانليق مني حئيرتلنديردي.
باكييا سون سفريميزده بير يئكونلاشديرما اجلاسيندا آكادميك بكير نبي‌يف، ياشار قارايئف دن دانيشاركن اونون چاليشقانليغيني و وظيفه‌لرده يورولمازليغيني تانيتديران بئله بير سؤز سؤيله‌دي: او دئدي: منيم ياشار قارايئف له بيرگه، بير چوخ مدني سفرلريميز اولور. بو سفرلرده من پروقرامين رسمي حيصه‌سيني بيتيرديكدن سونرا اؤزومو آزاد حس ائديرم. لاكين ياشارين چاليشمالاري رسمي پروقرامين قورتارماسي ايله باشلار. او رسمي حيصه‌دن ياخا قورتارينجا تلفونلا ايشه دوشر، گؤروشلر و دانيشيقلار باشلار و كيتابلار بير ـ بيري اوسته ييغيلار.
ياشار قارايئف ين چوخ ساحه‌لي بديعي ادبياتين ائستئتيك ـ نظري مسئله لرينه ياناشما و آراشديرما اوسلوبو، هر شئيدن اؤنجه، بير تاريخي ـ فلسفي ياناشما و آراشديرما اوسلوبودور. او، بو ياناشما و آراشديرمالاريندان زنگين و يئتگين ديل و سؤز باجارغيندان فايدالانماقلا بديعي‌ليگين تاريخي ـ فلسفي يؤنلريني رئاليزم قانونونا اويغونلوقلاري ايله اؤلچوب يئكونلاشديرماقدا بؤيوك مهارت‌له چيخيش ائدير. ياشار قارايئف ين اونلارلا يازديغي بديعي ـ تحليلي اثرلر، داشيديغي علمي ـ مدني مديريتلر و مسئوليتلر بير طرفده دورسون، اونون سون بؤيوك تحليلي اثري تاريخ: ياخيندان واوزاقدان آنلام دولغونلوغو، موضوع گئنيشليگي، ميللي ـ مدني پوتانسيئل، دوشونجه استقامتي و بونلارلا بيرليكده تحليلي (آناليتيك) متودا اساسلانديغي اوچون، حتي اولا بيلسين اوندا بعضي مباحثه‌لي يئرلر اولورسا دا، يوكسك آكادميك بير اثردير. كيتاب ادبيات تاريخيميزه يئني بير آنلام دوقتوريني قازانديرير.
مؤليف اثرين باشلانيشيندازامان و مكانين فلسفي ـ تاريخي آنلاميني وئرمكله، بو آنلامين اجتماعي تفكور و بديعي ياراديجيليق فئنومنلري نين و يا باشقا جور دئسك دوننكي و بو گونكو ادبياتيميزين آيري ـ آيري مرحله‌لرينده شخصيتلرين، دوشونجه‌لرين و حتي اسلوبلارين يارانماسيندان توتموش تا دراماتورگيانين، شعرين، نثرين زامان و مكانلا قيريلماز فيكري ـ بديعي رابطه ده اولدوغونو مهارتله گؤسترير.
تدقيقاتچي تهران عليشان اوغلونون، قارايف ين آلتميش ايلليگينه حصر ائتديگي علمي بروشوردا بو كيتاب (تاريخ: ياخيندان و اوزاقدان) حقينده دئيير:
«تصادفي دئييل كي، عاليم سانكي آلتميش ايلليك عؤمرونو ياراديجيليق حساباتي تاثيريني باغيشلايان سون اثرينده (تاريخ: ياخيندان و اوزاقدان) (1995) آدلي سانباللي كيتابيندا همين كونسپسيونو (عقيده ـ نظر ـ ف) «يادداشدا فيرلانان تاريخ» كيمي تصور و تقديم ائدير. اصلينده آذربايجان مدنيتي و ادبياتي نين تاريخي آنلاتما اوسلوبو واحددير. هر يئني ياناشما اونا مناسبتده يانليشلاري آرادان قالديرماغا، ياراديجيليغي بويو نظري شكلينده معين‌لشديرديگي ميللي ادبيات تاريخي‌نين كنزيسي ـ يارانيش اصولو ـ و تكامول پرنسيپلپريني ساخلاماغا، بو تاريخين بير سيرا صحيفه‌لرينه يئني تفكور ايشيغيندا باخير. اونون عموم تورك و شرق كونتئكستيني ـ (زمينه‌سيني ـ ف) برپا ائدير. (واحد ائتنيك محورده: «اورتاق شرق ـ اسلام انتباهي ـ نظامي گنجوي»،«تورك اسلام انتباهي نين زيروه‌سي ـ فضولي» ).
تدقيقاتچي آذربايجان مدنيتي نين عموم تورك سجيه‌سيني ادبيات تاريخي‌نين سونراكي مرحله‌لرينده ده نظردن قاچيرمير. اما اولكي دؤرلرده تورك خلقلري آراسيندا ژئنئتيك يادداش اورتاقليق ياراديرسا، يئني وچاغداش دؤرلرده بونا تاريخي ـ مدني علاقه‌لرده علاوه اولونور … (تهران عليشان، ياشار قارايئف: شخصيتي و عؤمور يولو، باكي، ص 23 ـ 22)
مطلبي قيسالداراق كيتابين اوسلوبو ايله ياخيندان و عياني تانيشليق اوچون آيري ـ آيري بؤلمه‌لريندن بيري «تورك ـ اسلام انتباهي‌نين زيروه‌سي فضولي» و ايكينجي سي «پؤئزيانين آراز آغريسي و يادداشي ـ شهريار» دان نمونه‌لر گتيرمك يئرلي اولاجاق:
آذربايجان (بوتؤنلوكده تورك) پوئزياسيني فضولي دن اولكي و سونراكي دؤرلرده آييرماق اولار. همين دؤرلر آراسينداكي فرق ميللي ـ معنوي و بديعي ـ فلسفي فيكرين تاريخينده فضولي نين شاعير ـ متفكير خدمتيندن يارانميشدير. محض فضولي دن سونرا شعرين و بديعي فلسفي فيكرين تاريخينده چوخ «چتينلر آسانا چئوريلميشدير». شاعير اونلاري دقيق معين ائتميش، چؤزه‌له‌مه‌يي (آيدينلاشديرماغي) قارشييا مقصد قويموش، هر دفعه ده بو يولدا اؤزونون بؤيوك ايناميني عيني حرارتله تكرار ائتميشدير. «منده توفيق اولسا بو دشواري آسان ائيلرم!».
«ليلي و مجنون»ون مناجاتيندا شاعير «دشواري آسان»،«يوخو وار» اائتمه‌يي تانري خصلتي حساب ائدير و يازير: «اي واري يوخ ائيله‌ين، يوخو وار» بس فضولي هانسي «واري يوخ، يوخو وار» ائيله‌ييب؟ آساني «دشوار»،«دشواري» آسان ائيله‌ييب؟ آخي محض بو خدمتلردن شرقده تورك اسلام اويانيشي‌نين تاريخي مرحله‌سي باش وئريب.
چتيني آسان ائتمكده فضولي هنري نين محتشمي، شاعيرين تورك ديلي قارشيسيندا خدمتلري دير.
پؤئزيادا و نثرده توركجه‌ني ده شرقده حاكيم عمومي مشترك ديل سويه‌سينه قالديرماق! فضولي نين شعورلو ـ نظري شكيلده قارشييا قويدوغو و علمي شكيلده سونا قده‌ر چؤزه‌له‌دييي دانته، شكسپير، پوشكين ايشي، ميللي ادبي ـ تاريخي وظيفه بو اولموشدور:
«اي فيض رسان عرب و تورك و عجم! قيلديــن عربـي افصح خلق عـالـم.
ائتديــن فصحــاي عجمـي عيسي دم، من تورك زباندان التفات ائيله‌مه كم».
ميللي ديلين تاريخينده و طالعينده شاعيرين رولونو و وظيفه سيني هله هئچ كس بو قده‌ر دريندن باشا دوشمه‌ميشدي. او، حتا تعزيه دارليغا ديلين منافعي و طالعي موقعيتيندن ياناشير، «حديقة السعدا»ني اونا گؤره قلمه آلير كي، حتا تعزيه مراسيملري ده توركجه اجرا اولونسون: «من ارنلرين همتي ايله بئله دوشونورم كي، كيتابي توركجه بيتيره‌جه‌يم».
حتا مولاناني دوغما آنا ديلينه فضولي چئويرير. « حديث اربعه»ني توركجه‌يه ترجمه ائدير.[1] نهايت، ان ياخشي اثريني ان دوغماديلده، آنا ديلينده، توركجه يازير. «ليلي و مجنون» و عرب تورپاغيندا عرب سوژئيتيني تورك ديلينده قلمه آلير! بو ايكي قات، اوچ قات ديل هنري ايدي. آخي بو وقته قده‌ر مجنون ائله محض بغداددا، ائله محض عربجه ديل آچميشدي. حتا گنجه‌ده ده بيزيمله فارسجا دانيشميشدي. ايندي ايسه عرب ديللي مجنون، اؤزو ده عربستانين لاپ گؤبه‌يينده بيزيمله توركجه دانيشيردي!… بورادا آرتيق نظامي ايله فضولي آراسيندا اويارليق يوخ … فرق باشلايير؛ نظامي دوغما يورددا باشقا ديلده، فضولي باشقا مكاندا دوغما ديلده يازير: البته، دوغماليق و يادليق يالنيز مكانا باغلي آنلاييش دئييل . او، عيني سويه ده زامانلا دا باغلي بير آنلاييشدير. صنعتكار هم تورپاق، هم ده زامان آدلي ايكي مكاندا عيني وقتده، مشترك «بيتير» و ياشايير. 12 ـ نجي يوز ايلده پوئزيادا فارس ديل مكاني حاكم ايدي. 16 ـ نجي عصرده ايسه بوتون ياخين و اورتا شرقده هم شفاهي، هم ده يازيلي بديعي عنعنه ده عمومي، واحد بير «تورك ديل مكاني» فورمالاشير. بو مكانين بؤيوك «مؤليفي» فضولي دير … (ياشار قارايئف، تاريخ: ياخيندان و اوزاقدان، باكي 1996 ص 178 ـ 177).
شهريار محبوس اولماميش، سؤزون حرفي معناسيندا زيندانا سالينميشدير. لاكين او خلقي كيمي، اونون دا روحونا معنوي زنجيردن شيريم و چات دوشموش، قلبي يوز زده‌دن مين يئره پارچالانميشدير. يارالاري نه قده‌ر ايچه، درينه ايشله‌سه ده، دردي نه قده‌ر يانديرسا دا ـ ياخسادا شاعير ـ قهرمانين عصياني داها آمانسيزدير. ظولمه غضبي، كيني عرشه يوكسلميشدير. چرخلري چؤنده‌رن، «فلكي شوشه كيمي قيريب تؤكن» شاعير آهي ان اوزاق ووران، ان قدرتلي سيلاحدان داها گوجلودور. توپلارين، گولله‌لرين فيزيكي واهمه‌سي عصيان چاغيريشيني ائشيتمزليگه ووروب، شهرياردا يالنيز ترك دونياليق، يالنيز حجره‌چيليك، درويشليك آختارسايديق، گوناها باتميش اولارديق …
شهريار عرفانيليگينده بيزيم عنعنه‌وي ـ ميللي بديعي فلسفه‌نين، رومانتيك رنگلره بويانميش وتصووفون گئنيش يئر توتماسي دا مهم ادبي ـ تاريخي قانونا اويغونلوق، بديعي ائستئتيك ضرورت وارثي (ژنولوژي) يئكون سجيه‌سينده‌دير.
«فلك چونسه ده، چرخي چؤنمه ين، سؤنمه ين» شهريار ايناملي، ايمانلي شاعيردير. تانري درگاهينا اوز توتان فيلسوفدور، فقط فاناتيك دئييل؛} «اهل مذهبدير» فقط موهومات اهلي دئييل، رندانه دير، زاهد دئييل، صوفي دير، واعظ دئييل. رندانه ليك پياله‌سينده شاعيرين نوش ائتديگي مقدس مئي محض ايلاهي‌يه (تانري‌يه) قووشماق اوچون ايچيلن معنوي ديريليك سويودور. بو آب كوثر هر كسه قيسمت اولماز. آنجاق رندانه‌ليك ـ ايلاهي كاميلليك مقامينا چاتان آللاه بنده‌لرينه بو خوشبختليك ميسر اولا بيلر. محض بو معنادا حافظ ين، نظامي نين، فضولي نين ايچديگي وحدت شرابيني شهريارين دا ايچمه‌يه معنوي ـ وجداني و ايلاهي ـ اخلاقي حقي واردير. بو حقي اونا عارفانه‌ليك كاميليگي، شاعير ـ متفكر پاكليغي، مودريكليلي، مقدسليگي و اولولوغو وئرير. ائله بونا گؤره‌ديركي، رومانتيك بير ايلغيم آخاريندا گؤرونوب يوخ اولمور، هميشه اؤز هموطنلري نين، همدردلري نين، همنفسلري نين، همفيكيرلري نين احاطه سينده گؤرونور:درده دوشنه غمخوار اولور، مصيبت چكه‌نين هارايينا يئتير، يولدان آزانا يول گؤسترير، چراغي سؤننه شمع يانديرير… (يئنه اورادان، ص 439 ـ 437)
—————————————–
1] اوستادين مولانادان مقصدي مولانا عبدالرحمن جامي اولمالي دير، يوخسا فضولي مولوي نين هئچ بير اثريني آنا ديليميزه ترجمه ائتمه‌ميشدير ج . هيئت