آذربایجانین مبارزه شعرینه بیر باخیش

آذربايجانين‌ مبارزه‌ شعرينه‌ اؤ تركي بير باخيش‌، 1300ينجي‌ ايله‌ قدر
آذربايجانين‌ مبارز و مقاومت‌ پوئزياسي‌ اوزون‌ بير تاريخه‌ مالك‌ اولدوغو كيمي‌، تاسف‌له‌ بو گونه‌ قدر نه‌ ايسه‌ آچيقلانماميش‌ دير. بو اولوسال‌ ادبياتين‌ چاغداش‌ شعر و نثريميزده‌ دانيلماز رولو اولموش‌ دور. مبارزشعريميز دئمك‌ اؤتن‌ قرنده‌ن‌ داها زنگين‌لشير. همين‌ شعرلر تانباكي‌ حركاتي‌ ايله‌ چيچك‌لنميش‌ و داها سونرالار خوش‌ بويالي‌ گوللر يئتيرميش‌ دير. تانباكي‌ حركتي‌، تاريخ‌ بويلو تبريزده‌ باش‌توتدو‌. بو حركت‌ناصرالدين‌ شاهين‌ سون‌ شاهليق‌ چاغلاريندا 1269 دا اوز وئريب‌ و سبب‌ اولدو، خالق‌ كوتله‌لري‌ قيام‌ ائده‌لر، بو آرا فيكير و قلم‌ صاحب‌لري‌ ده‌ گئري‌ قالمادي‌لار.
اوچاغين‌ ايتگين‌ شاعيري‌ ميرزه‌ فرخ‌ همين‌ نهضتين‌ توقوشمالارينين‌ بير سير اسين‌ خصوصي‌ ايله‌ زينت‌ پاشا عصيانين‌ تام‌ باجاريقلا شعره‌ چكميش‌ دير. ميرزه‌ فرخ -ون‌ حياتي‌ و باشقايارا ديجيليغي‌ حاقدا معلومات‌يوخ‌ دور. آنجاق‌، اونون‌ بير - ايكي‌ پارچا الده‌ اولان‌ شعرلريندن‌ اونو ضيالي‌ تانيماق‌ هئچ‌ ده‌ چتين‌ دئييل‌. ميرزه‌ فرخ-‌ون‌ (سبك‌شناسي‌) باخيميندان‌ تبرير شاعيري‌ اولدوسوندا هئچ‌ بير شبهه‌ يئري‌ اولا بيلمز. نيه‌كي‌،اونون‌ شعرلرينده‌ تبريز لهجه‌سي‌ دالغالانير و بو شاعيرين‌ نهضت‌ چاغلاريندا نسبتاً ياشلي‌ اولماسي‌ داحدس‌ ويريلير. او شعرلرينين‌ بيرينده‌ دئيير:
بو حقير ائوده‌ اوگون‌ قورخودان‌ آواره‌ قاليب‌
تازه‌دن‌ توپ‌ و توفنگين‌ سسي‌ ناگه‌ اوجاليب‌
رنگي‌ تغيير تاپيب‌ حالتي‌ يكسر دولانيب
‌آز قاليب‌ قورخودان‌ اول‌ وقته‌ اولا ديوانه‌
قالدي‌ تبريزده‌ چوخ‌ تخت‌ حكومت‌ خالي
‌گتيريب‌ ائيله‌ ديلر قائم‌ مقامي‌ والي‌
اوزو وئرميردي‌ كونول‌ ]آمما[ ولي‌ اقبالي‌
حكمران‌ اولدو عجب‌ مملكت‌ ايرانه‌
تبريزه‌ حاكم‌ اولاندا بو، اولوب‌ شهر شولوق‌
اولماميشدي‌ بو نئچه‌ وقتده‌ بو نوع‌ باهاليق‌
گؤردولر يوخدو به‌ غيرت‌ كيشيلرده‌ كيشي‌ليك
‌غيرت‌ ال‌ وئردي‌ اناثه‌كي‌ چيخا مئيدانه‌
داها حيرت‌ ائديجي‌ بودوركي‌، 1320 ده‌ چيخان‌ گونده‌ليك‌لرين‌ بيرينده‌ هلال‌ امضاسي‌ ايله‌ زينب‌ پاشا حاقيندا يازيلان‌ بير مقاله‌نين‌ اته‌ينده‌كي‌ معروف‌ شعر (زينب‌ پاشا الده‌ زوپا اوز قويدو بازار اوستونه‌) ده‌ درج‌اولموش‌ دور، بو شاعيرين‌ تخلصي‌ (باجادان‌ باخان‌) قئيد اولموش‌ دور. بيليريك‌كي‌، اودورون‌ شاعيرلرينده‌ن‌ رحمتلي‌ تبريزلي‌ علي‌ فطرت‌ همين‌ امضا ايله‌ يازاردي‌ امما، نه‌ ايسه‌ همين‌ شعرده‌ ائله‌ او تخلص‌له‌ درج‌اولموش‌ دور اگر بو مسئله‌نين‌ سهوي‌ اولماسا، ميرزه‌ فرخ‌ آذربايجانين‌ ميللي‌ حؤكومتينين‌ عرفه‌سينه‌ قدر ساغ‌ اولان‌ بير شاعيرلردن‌ ايدي‌. باجادان‌ باخانين‌ بو شعرينده‌ن‌ علاوه‌ همين‌ گؤنده‌ليك‌ ده‌ بير سيرا باشقاشعرلرينده‌ن‌ ده‌ اورنك‌لر وئريلميش‌ دير. بئله‌ليكله‌ گؤروروك‌، همين‌ جريان‌ سبب‌ اولور بير سيرا شعرلر قوشولسون‌. بونلارين‌ بير سيراسين‌ ائله‌ خالق‌ اؤزوقوشسادا اونلارين‌ ميللي‌ شعورلارينين‌ يوكسك‌ سويه‌ده‌ اولدوغوگوسترير. بو شعرلر ارزيشلي‌ سند اولاراق‌، تاريخيميزده‌ اؤزه‌ل‌ بير يئرده‌ اولموش‌لار. تانباكي‌ حركاتينين‌ مبارزه‌سينده‌ «زينب‌ پاشا» عصياني‌دا مهم‌ بير يئرتوتور. بو عصياندا بير سيرا شعرلر قوشولور. تاسف‌له‌ اونلارين‌قوشانلارينين‌ آدلاري‌ حله‌ليك‌ بيزه‌ بللي‌ و آيدين‌ اولماميش‌ دير. بو عصياني‌ گؤره‌ن‌ بير شاعير. گؤردوكلرين‌ گؤزه‌لجه‌ شعر چرچيوه‌سينه‌ سالميش‌ دير.
زينب‌ پاشا الده‌ زوپا اوز قويدو بازار اوستونه‌گوياكي‌، دشمن‌ اوزقويوب‌ اوردوي‌ تاتار اوستونه‌
چادور شبين‌ باغلايب‌ بئله‌ هم‌ چيرميوب‌ قولاريني‌ياشما قيله‌ دوتموش‌ اوزون‌، هم‌ ساللانان‌ پوللاريني‌
تنظيم‌ ائديب‌ از نقشه‌سين‌ هم‌ گئتديكي‌ بوللاريني‌فرمان‌ وئريب‌ يولداشلارين‌ اويناتدي‌ اغيار اوستونه‌
زينب‌ پاشا الده‌ زوپا اوز قويدو بازار اوسته‌…
داها سونرا مشروطه‌ حركاتي‌ اوزوئرير. هر يئر چال‌ - چاپ‌ دير. هاي‌ - كوي‌ دور، باروت‌ قوخوسودور. بو دؤنه‌ ايش‌ فرق‌ ائدير. بئله‌كي‌، مشروطه‌ده‌ن‌ اول‌ ده‌كي‌ شعرلر شعار دورسالار، مشروطه‌ دوورو شعرلر داها خالقي‌هيجاناگه‌ تيره‌ن‌، اونلارا اوره‌ك‌ و جرئت‌ وئره‌ن‌، اونلارين‌ مبارزه‌ و دويوشه‌ چاغيران‌ و بو كيمي‌ اسلوب‌ و ژانرلري‌ ايفا ائديرلر. مشروطه‌ دؤرونده‌كي‌ شاعيرلر، مشروطه‌ني‌ ياخيندان‌ گؤردوكده‌، اونون‌ آجي‌ و شيرين‌ وهابئله‌ تصويرلرين‌ شعرلرينين‌ بزه‌يي‌ ائتميشلر. بو دورون‌ شعرلري‌ داها اونجه‌ دئيلن‌ شعرلرله‌ فرقلي‌ اولموشلار. البت‌ بو طبيعي‌ ديركي‌، هر انقلابين‌ ثمرلي‌ ايش‌لرينده‌ن‌ بير سيرا يئني‌ فكير و دوشونجه‌لرين‌ مئيدانا ودوغرو دئسك‌ اورتايا كلمه‌سي‌ اولار.
اونجه‌ دئدييميز كيمي‌ (تحريم‌ تنباكو) آدي‌ ايله‌ مشهور آذربايجاندان‌ قالخان‌ حركت‌لركي‌، دئمك‌ مشروطه‌يه‌ بير گيريش‌ كيمي‌ ايدي‌ بير چوخ‌ ضيالي‌لر و آيدين‌ فيكيرلي‌لر باراگه‌ تيردي‌. ماراغالي‌ زين‌العابدين‌. تبريزلي‌طالبوف‌ و… كي‌ بونلاردا اؤز يئني‌ دوشونجه‌لرين‌ خالق‌ كوتله‌لرينين‌ قوللوقلاريندا قويماقلا برابر، اونلارين‌ اسكي‌ و كهنه‌ فيكيرلرده‌ن‌ ال‌ كؤتورمه‌لرين‌ ايسته‌ميش‌لركي‌، بئله‌ده‌ اولدو. همين‌ آدوئر دييميز يازيچي‌لارلا بيرگه‌نئجه‌ يازيچي‌ و شاعير دانيلماز ديشيك‌لر يارادا بيلدي‌لركي‌، اونلارين‌ داوامچي‌لاري‌ مشروطه‌ دورونده‌كي‌ يازيچي‌ و شاعيرلر اولدولار و بو دؤنه‌ وضعيت‌ كئچميشده‌كي‌ كيمي‌ اولمادي‌.
ميللي‌ شعورلار اوياندي‌لار، يازيچي‌ و شاعيرلرين‌ سانلاري‌ چوخالدي‌، شهيدلرين‌ سايي‌ آرتدي‌. بورادا ايش‌ دوندو. حسرت‌ اوْلدو، يولداش‌ اؤلدو، ديدرگين‌ليك‌ بارا گلدي‌. آوارا - سفيل‌ليك‌ اوْلدو، مخروبه‌ يئرلر وآبيده‌لر گؤزه‌ ديدي‌. بو دؤنه‌ يارالي‌ اوْلدو، خسته‌ اوْلدو، توپال‌ اوْلدو، و نهايت‌ مبارز شعرلريميزين‌ اصل‌ ماياسي‌ بو كيمي‌ حادثه‌لرده‌ن‌ آليندي‌. او دوورون‌ شعرلرينين‌ و شاعيرلرينين‌ بير چوخو، شاهي‌، وزيري‌، وكيلي‌ و…تعريف‌ - تمجيد ائدنده‌، باشقا شاعيرلرايله‌ حيئوانلارين‌ ديللرينده‌ن‌ ناغيل‌ و سئوگي‌لينين‌ قاش‌ - گؤزوندن‌ و… يازير سالاردا آنجاق‌، ضيالي‌ و آيدين‌ فيكيرلي‌ شاعيرلر خالقي‌ يوخودان‌ اوياتماغا و يئني‌ اصوللاري‌ و پرنصيب‌لري‌ دويماغا چاغيريردي‌لار. بو يازيچي‌ و شاعيرلرين‌ بللي‌ ديركي‌، سولاري‌ باشقلاري‌ ايله‌ بير آرخا كئده‌ بيلمزيدي‌. ائله‌ اوناگؤره‌، مدّاح‌ و دربار شاعيرلري‌ ضيالي‌ و ده‌يرلي‌ اسلوب‌دا يازيلان‌ ماتيرياللاري‌ ويازارلارين‌ قيناييردي‌لار و او گون‌ اونلارين‌ گوزونده‌ خائين‌لر بوگون‌ تام‌ عكسينه‌ اولاراق‌ خادم‌ كيمي‌ آدلانيب‌ عزيزله‌نيرلر. اوست‌ - اوسته‌ مبارز شعريميزين‌ سيماسين‌ گنج‌لر دولدوردولار و ائله‌ اونا گؤره‌ خالق‌ ديلينه‌چوخ‌ ياخينلاشدي‌. بو دوورلرده‌ خالقين‌ دا شعرلري‌ گئنيشلنير. چوخلو باياتي‌ قوشولور. چوخلو تاپماجا دئيلير. بير سيرا ناغيل‌لار يئكونلاشير، ميللي‌ قهرمانلاريميزا شعرلر دئيلير. بونلارين‌ بير سيرا سينين‌ حتي‌قوشانلاري‌ و دئين‌لري‌ ده‌ بللي‌ دئييل‌ كيم‌لر اولموشلار. بلكه‌ده‌ اونلاري‌ ائله‌ ساده‌ خالق‌ ياراتميش‌ و گاهداندا بير شاعيرين‌ يئري‌ و ايزي‌ بللي‌ اولموش‌ دور. دئدييميز كيمي‌ همين‌ دوورلرده‌ ايگيد قهرمانلاريميز چون‌ خالق‌كوته‌لرينه‌ ارزش‌ و قيمت‌ وئريردي‌لر و اونلارين‌ حق‌لرين‌ و ايستك‌لرين‌ قوروماق‌ اوچون‌ جانلارين‌ او وجلاريندا قويوردولار خالق‌دا اونلاري‌ سئوه‌ر و اونلارا حورمت‌ گؤزو ايله‌ باخيردي‌لار.
تبريز اهلي‌ اوچ‌ ايل‌ چكدي‌ مشقت‌پامال‌ اولدو آياق‌ آلتدا رعيت‌
مشروطه‌ني‌ آلدي‌ آخيردا ملت‌ياشاسين‌ ستارخان‌، ملت‌ ياشاسين‌
باقرخان‌ آتليسي‌ جمله‌ ياشاسين‌
حلال‌ اولسون‌ اوسودكي‌ سن‌ ايچميسن‌جاندان‌ كئچيب‌ بو ايشده‌ دايانميسن‌
بي‌غيرت‌ رحيم‌خان‌ هئچ‌ اوتانميرسان‌؟!ياشاسين‌ ستارخان‌، ملت‌ ياشاسين‌
باقرخان‌ آتليسي‌ جمله‌ ياشاسين‌…
يا حيدرخان‌ عمي‌ اوغلويا حصر اولونان‌ شعرلرده‌ن‌:
عم‌ اوغلو گلدي‌ خوياخويلولارا قرار قويا
يئتيم‌لرين‌ قارني‌ دوياياشاسين‌ گؤزه‌ل‌ عمو اوغلو
راستا بازارين‌ راستاسي‌گلير مجاهد دسته‌سي‌
عمو اوغلو دور سركرده‌سي‌ياشاسين‌ گؤزه‌ل‌ عمو اوغلو
بونلاردان‌ اونجه‌ فتحعليشاه‌ زاماني‌ چيركين‌ (تركمن‌چاي‌) و (گلستان‌) معاهيده‌لري‌ باغلاناندا بو كيمي‌ درين‌ معنالي‌ باياتيلار قوشولدو:
آراز سندن‌ كيم‌ گئچدي‌كيم‌ غرق‌ اولدو كيم‌ گئچدي‌
فلك‌ گل‌ ثابت‌ ايله‌هانكي‌ گونوم‌ خوش‌ گئچدي‌
آراز، آراز قان‌ آرازسلطان‌ آرازخان‌ آراز
سني‌ گؤروم‌ ياناسان‌بير درديمي‌ قان‌ آراز
آرازي‌ آيردي‌ لارقومونان‌ دويوردولار
من‌ سندن‌ آيريلمازديم‌ظلم‌ ايله‌ آيردي‌ ديلار
دويوشچولرين‌ و ميلي‌ قهرمانلارين‌ جسارت‌ و شجاعت‌لري‌ بودوورون‌ شاعيرلرينه‌ الهام‌ قاينالي‌ اولاراق‌ گؤزه‌ل‌، گؤزه‌ل‌ شعرلر قوشولورو. داها سونرا همين‌ شعرلر ماهني‌ كيمي‌ دويوش‌ سنگرينده‌ ماراق‌ و خوش‌آهنگ‌لرله‌ اوخونوب‌ مجاهدلرين‌ قانلارين‌ جوشدورور.
تاسف‌له‌ اوست‌ سطيرلرده‌ دئدييميز كيمي‌ بو دوورون‌ شعرلري‌ نه‌ ايسه‌لازيمي‌ قدر اولموش‌ سادا آچيقلانماميش‌ و آچيلماميش‌ بير صحيفه‌ كيمي‌ قالميش‌ و يئكونلاشماسي‌ يئرلي‌ - ياتاقلي‌ گؤرونور. آخ‌ بودوورده‌ خازن‌لروار، حقيقت‌لر وار، سعيد سلماسي‌لر وار و غيره‌لر وار. اونلارلا برابر صابرلر وار. صابرين‌ آن‌ ياخين‌ دوستو عباس‌ صحتين‌ فيكريجه‌، صابرين‌ آخيرده‌كي‌ 5 ايل‌ ياراديجيلغي‌ بير اوردودان‌ چوخ‌ مشروطه‌ حركاتيناخدمت‌ ائتدي‌. دوز دوزكي‌، كئچميشده‌ رحمتلي‌ پروفسور محمدتقي‌ زهتابي‌ ده‌يرلي‌ وارليغين‌ اؤتن‌ ساييلاريندا (مشروطه‌ دوري‌ ادبياتيميزين‌ مقدراتي‌) باشليقي‌ مقاله‌سينين‌ گيريشينده‌ دانيشديغيميز حيصه‌يه‌ اؤتري‌باخيب‌، هابئله‌، اوستاد محمدعلي‌ فرزانه‌ (چشم‌انداز شعر مبارز آذربايجان‌) عنوانلي‌ مقاله‌سينده‌ بير سيرا دويونلري‌ آچميشالاردا، آنجاق‌ اولدوغو كيمي‌ اشاره‌ اولونماميش‌ و گئنيش‌ بير تحقيق‌ آپارما يئري‌ بوش‌ گؤرونور.دوغروسو چاغيميزين‌ بو شعر بؤلومو مظلومجاسينا نئچه‌ قالميش‌ دير؟! هم‌ دونن‌ همده‌ بوگون‌، مشروطه‌ ايل‌لري‌ كي‌، آذربايجانين‌ مبارز شعرينه‌ قزئت‌لرده‌ ائله‌ بير يئر آچيلماميش‌ دير. خالقين‌ ديللرينده‌ گزيردي‌ وهرده‌ن‌ بير شعر بير قزئتين‌ بير بوجاغيندا چاپ‌ اولدوقدا، ايكنجي‌ دونه‌ اونا اخطار وئريليردي‌ و بعضاً ده‌ روزنامه‌نين‌ قاپوسو تخته‌له‌نيردي‌. باخين‌ انجمن‌، ملانصرالدين‌، آذربايجان‌، نالة‌ ملت‌ و … كيمي‌ قزئت‌لرين‌ آخير- عاقبتينه‌!
بئله‌ليكه‌ بو سبب‌لره‌ گؤره‌ آذربايجانين‌ مبارز شعرينين‌ تاريخينده‌ن‌ يا خودده‌يرلي‌ اؤرنگ‌لرينده‌ن‌ گونش‌ ايلي‌ 1300 اونجو ايله‌ قدر آغيز يانديران‌ بير شئي‌ حله‌ليك‌ الده‌ يوخدور و دئدييميز كيمي‌ اونوندا علتي‌ معين‌سبب‌لر اولموش‌ دوركي‌، دئديك‌. بيزجه‌ بو دوورون‌ شعرلري‌ يئكونلاشمالي‌ و الك‌ - قلبير ائتمه‌لي‌ ايش‌لرين‌ آن‌ ضروروسودور. آشاغيدا تقديم‌ ائده‌جه‌ييميز اؤرنگ‌لر 30 ايل‌ليك‌ آذربايجان‌ مبارز شعرينين‌ نمونه‌لري‌ديرلر.
تبريزلي‌ حقيقت‌
رحمتلي‌ مشهدي‌ محمدباقر حقايقي‌ مطبعه‌چي‌ (تبريزلي‌ حقيقت‌) 1281 ينجي‌ قمري‌ ايلينده‌ تبريزين‌ مقصوديه‌ محله‌سينده‌ آنادان‌ اولموش‌ دور. او گنج‌ چاغلاريندا روسيه‌يه‌ گئدير و اورادا بير تاجيركيمي‌ ايشه‌سه‌ده‌آنجاق‌ ادبياتا اؤزه‌ل‌ ماراق‌ گوسترير و ائله‌ بو سببه‌ بيرسيرا شاعير و يازيچي‌ ايله‌ ايستر - ايسته‌مز تانيش‌ اولور. او بير اورتاياشلي‌ اولاراق‌ مشروطه‌ سسي‌ قولاغيناده‌ير و ائله‌ همين‌ زامان‌ آنايوردونا كؤچوب‌ و مجاهيدلرله‌چيين‌ - چينده‌ استبدادلا دويوشور. او تبريزده‌كي‌ زاماني‌ مشهور شاعير و مجاهيد سعيد سلماسي‌ ايله‌ بير چاپخانه‌ داير ائديب‌ اورادا بير چوخ‌ گيزلي‌ شبنامه‌ و اعلاميه‌لر ويريرلاركي‌، نهايت‌ ارتجاع‌ قوه‌لري‌ بيليب‌اوراني‌دارما - داغين‌ ائديب‌ و اونلاري‌ سورگون‌ سالميشلار. عؤمرونون‌ بير چوخ‌ حيصه‌سين‌ دويوشلرده‌ قوبان‌ حقيقت‌ سون‌ چاغلاري‌ خوراسانا گئديب‌ و نهايت‌ گونش‌ ايلي‌ 1317 ده‌ اورادا فوت‌ ائدير.
اي‌ ستمگر اولا راغب‌ ملتين‌ افناسيناپادشاهسان‌ گئت‌ گيلن‌ بيگانه‌لر دعواسينا
مسلمين‌ قاني‌ مباح‌ اولماز باتيرما اللرين‌اولما چوخ‌ مغرور شاهيم‌! محتكر فتواسينا
اوتوز ايل‌ نازين‌ چكن‌ شهره‌ عجب‌ وئردين‌ عوض‌خطة‌ تبريزي‌ دؤنده‌ردين‌ بلا صحراسينا
سهل‌ سانما ائت‌ گيلن‌ مظلوم‌ قانيندان‌ ]سن‌[ حذرقورخ‌ او گؤنده‌ن‌ غرق‌ اولورسان‌ سنده‌ قان‌ درياسينا
وقت‌ او وقتدور كيم‌ سنين‌ هم‌ اولسون‌ اقبالين‌ نگون‌چونكو ظلمون‌ چيخميسان‌ بير ذيروة‌ اعلاسينا
بيزا گر فيض‌ شهادت‌ درك‌ ائده‌ك‌ سيز سعي‌ ائدين‌اي‌ بيزيم‌ اولاديميز مشروطه‌نين‌ اجراسينا
وئرديلر فتوا مجاهد قتلينه‌ آل‌ يزيدرسمدور تقليد ائدر هر كيمسه‌ اؤز مولاسينا
ميرزه‌ گولزار حامبال‌
بايرامعلي‌ عباس‌زاده‌كي‌، شعرده‌ حامبال‌، ميرزه‌، گولزار و ميرزه‌ گولزار امضالاري‌ ايله‌ شعر يازاردي‌ گونش‌ ايلي‌ 1238 ده‌ سارابين‌ دونني‌ كندينده‌ آنادان‌ اولدو. شاعير ميرزه‌ گولزار بويا چاتديقدا ياشايش‌ چتين‌ليك‌لري‌ياخالايب‌ و آجي‌ بير عؤمور سورمه‌يه‌ محكوم‌ اولور و نهايت‌ اوتاي‌ آذربايجانا گئديب‌ اؤزون‌ اويان‌ - بويانا ويرديقدا حامبالّيق‌ ائدير. همين‌ زاماندا ياخيندان‌ مشروطه‌ انقلابيندان‌ خبرسيز اولمايب‌ و اوزاقدان‌ - اوزاغا وگاهدان‌ ياخيندان‌ اونلا علاقه‌ ساخلاير و اؤز آتشين‌ شعرلري‌ ايله‌ مشروطه‌چي‌لره‌ يارديم‌ ائدير. داها سونرا صابر كيمي‌ دونيا شهرتلي‌ شاعيرله‌ گؤروشوب‌ و معروف‌ موللا نصرالدين‌ قازئتي‌ ايله‌ ماراقلانيب‌ نهايت‌ شعرلري‌اورادا جليل‌ محمد قولوزاده‌نين‌ همتي‌ ايله‌ چاپ‌ اولور. او اينانيلماز حالدا گونش‌ ايلي‌ 1305 ده‌ فوت‌ ائدير. ميرزه‌ گولزارين‌ شعرلري‌ اوتايدا ايشيق‌ اوزو گؤروب‌ و ائشيددييميزه‌ گؤره‌ بوتايدا ايسه‌ رحمتلي‌ تبريزلي‌ آزرم‌(محمود ملماسي‌) اونون‌ بير سيرا شعرلرين‌ توپلاميش‌ دير كي‌ طالع‌لرينده‌ن‌ خبرسيزايك‌.
مشروطه‌ بيزيم‌ جانيميزي‌ آلدي‌ داداش‌ جان‌آواره‌ ائديب‌ چؤللره‌ده‌ سالدي‌ داداش‌ جان‌
هر يئرده‌ اولور مئيوه‌سي‌ شيرين‌ بو درختين‌ايران‌ دا يئتيش‌ ميبدي‌ هله‌ كالدي‌دا داش‌ جان‌
خــازن‌
رحمتلي‌ ميرعبدالحسين‌ خازن‌، تبريزين‌ خياوان‌ محله‌سينده‌ گونش‌ ايلي‌ 1250 ده‌ آنادان‌ اولموش‌ و بير عمر آجي‌ - شيرين‌ ياشايشدان‌ سونرا 1304 ده‌ تبريزده‌ حياتين‌ ده‌ييشميش‌ دير. او يازديقلارا گؤره‌، كلاس‌گؤرمه‌ميش‌ و سوادسيز بير شاعير ايدي‌. آنجاق‌ الده‌ اولان‌ شعرلرينده‌ن‌ بللي‌ اولور كي‌، اونون‌ لازيمي‌ قدر ساوادي‌ وار و ائله‌ بو سببه‌ گؤره‌ اوره‌ك‌ يانديريجي‌ نووحه‌لر و گؤزه‌ل‌ غزللرله‌ برابر حماسي‌ و مبارزه‌ شعرلري‌ وار.اونون‌ ادبي‌ ياشاييشي‌ ايكي‌ طرفلي‌ اولموش‌ دور. بير طرفي‌ مرثيه‌ ادبياتي‌نين‌ ان‌ تانينميش‌ و گوركملي‌ نماينده‌لرينده‌ن‌ باشقا طرفده‌ن‌ ايسه‌، مشروطه‌ حركاتين‌ ياخيندان‌ دويوب‌ و ايستر - ايسته‌مز بو حركت‌لرله‌ چين‌ -چينه‌ وئرميش‌ و شعرلري‌ سنگرلرده‌ دويوشن‌ مجاهدلرين‌ قانلارين‌ قايناديب‌ و حركته‌ گه‌تيرميش‌دير. خازنين‌ اله‌ گلن‌ شعر ديوانين‌ بو سطرلرين‌ يازاني‌ توپلايب‌ چاپا حاضيرله‌ميش‌دير.
باغلانان‌ زنجيره‌ بيداده‌ يازيق‌ ايرانلي‌لاراولمايان‌ آسوده‌ دونياده‌ يازيق‌ ايرانلي‌لار
تيتره‌ين‌ بير مرغ‌ بسمل‌ تك‌ كف‌ جلادده‌صيد اولان‌ بي‌رحم‌ صياده‌ يازيق‌ ايرانلي‌لار…
يا بير شعرينده‌ بئله‌ سؤيله‌ميش‌ دير:
اهل‌ دوه‌چي‌ گليبدي‌ جنگه‌بئش‌ بئش‌ بامادور باسير توفنگه‌
هرده‌ن‌ بيريني‌ آتير هوايه‌لعنت‌ بئله‌ قوم‌ بي‌حيايه‌.
ميرزه‌ جعفر خامنه‌اي‌
شيخ‌ علي‌اكبر اوغلو ميرزه‌ جعفر نقوي‌ خامنه‌ گونش‌ ايلي‌ 1265 ده‌ تبريز شهرينده‌ آنادان‌ اولموش‌ و گنج‌ چاغلاري‌ مشروطه‌ قهرمانلارينين‌ اؤن‌لريندن‌ گئدنلردن‌ اولموشدور. او، سعيد سلماسي‌ و رفعت‌ و بير نئچه‌شاعيرله‌ بيرگه‌ يئني‌ شعرين‌ بينووره‌سين‌ قويدو. خامنه‌اي‌ پهلوي‌ رژيمي‌ ايش‌ باشينا چيخديقدان‌ سونرا داها انزوا اختيار ائديب‌ نهايت‌ 28/4/1362 ده‌ دوغولدوغو شهرده‌ دونياسين‌ ديشميشدير. اونون‌ چاغداش‌ادبياتيميزدان‌ علاوه‌ مبارز شعر و ادبياتيميزا دانيلماز و گؤركملي‌ ايزي‌ اولموشدور. آشاغي‌ دا بير گه‌ بو آرزي‌ گؤز شاعيرين‌ بير توركجه‌ شعرين‌ بيرليكده‌ اوخوياق‌.
وطن‌ يولوندا شهادت‌ بويوك‌ سعادت‌ ديرسعادت‌ ابدي‌ ايسته‌سن‌ شهادت‌ دير
باخين‌ يئگانه‌ پرستانه‌ اخذ عبرت‌ ائدين‌شهادت‌ اونلارا عالمده‌ ارث‌ و عادت‌ دير
باخين‌ وطن‌ نسل‌ احراره‌ يالوارير سويليرندنمي‌ يوخلاميسيز وقت‌ عرض‌ همت‌ دير
نثار جاندان‌ احرار ايلمز امساك‌كي‌ بذل‌ جان‌ و سر اونلارجا بس‌ شرافت‌ دير
ره‌ وطنده‌ او (تن‌) كيم‌ قيزيل‌ قانه‌ بويانابسان‌ لاله‌ گولوستان‌ عشقه‌ زينت‌ دير
او (باش‌)كي‌ گئتمه‌يه‌ ملت‌ يولوندا حملي‌ اونون‌حميت‌ اهلي‌ يانيندا بويوك‌ مشقت‌ دير…
دلـريش‌
رحمتلي‌ تبريزلي‌ مشهدي‌ علي‌ اصغر دلريش‌ بير نووحه‌ شاعيري‌ اولسادا، مبارز شعريميزده‌ رولو اولموشدور. او، تانباكي‌ حركاتيندا آذربايجان‌، خصوصي‌ ايله‌ تبريزده‌ بويوك‌ نقشي‌ اولان‌ رحمتلي‌ حاج‌ ميرزه‌ جواد آقامجتهد فوت‌ ائده‌ركن‌، نئچه‌ - نئجه‌ فارسجا و توركجه‌ آغيت‌ يازميش‌ كي‌، هله‌ليك‌ ديوانيندا قورونور. دلريش‌ شعرلرينين‌ و يا ياخشي‌ دئسك‌ مرثيه‌لرينين‌ بيرينده‌ حاج‌ ميرزه‌ جواد آقادان‌ بئله‌ ياد ائدير:
اي‌ خدا بي‌درد بي‌درمانه‌ درمان‌ ايستيريك‌بنده‌لرده‌ قالمايب‌ جان‌ تازه‌ده‌ن‌ جان‌ ايستريك‌
آديميز گر بنده‌ دير ليكن‌ هامي‌ شرمنده‌ييخ‌بو بلانين‌ دفعيني‌ اي‌ حي‌ سبحان‌ ايستريك‌…
داها ديوانينين‌ سون‌ صحيفه‌لرينده‌ «در تعريف‌ سلطان‌ روم‌ و شاهنشاه‌ ايران‌ مظفرالدين‌ شاه‌ قاجار» باشليقلي‌ يازيدان‌ سونرا بئله‌ يازير:
يارب‌ بحق‌ جاه‌ جلال‌ محمدي‌تا بنده‌ ماه‌ بدر جمال‌ محمدي‌
سلطان‌ رومي‌ حفظ‌ ائله‌ لطفيله‌ يا حميدبير حورمت‌ عظيم‌ كلام‌ الهي‌ مجيد
تبريزلي‌ صرّاف‌
تبريزلي‌ حاج‌ رضا صراف‌ غزل‌ و نوحه‌ ژانريميزين‌ اَن‌ پارلاق‌ سيمالرينده‌ن‌ دير. او 1271 قمري‌ده‌ تبريزده‌ آنادان‌ اولموش‌ و 1325 ربيع‌الاول‌ آيي‌نين‌ 17 سينده‌ حقه‌ساري‌ قاناد چالميش‌ دير. بير سيرا يازيچي‌ وآراشديريجي‌لار صرّافي‌ تورك‌ دونياسينين‌ حافظي‌ آد وئره‌ره‌ك‌، غزل‌لرين‌ حافظ‌له‌ قياس‌ ائتميش‌لر. اونون‌ دادلي‌ - دوزلو غزل‌لرينده‌ن‌ علاوه‌، اوره‌ك‌ يانديريجي‌ نووحه‌ و مرثيه‌لري‌ده‌ واركي‌، هله‌ليك‌ آذربايجانين‌ ياس‌توره‌نلرينده‌ حزن‌له‌ اوخونار.
صرافين‌ مشروطه‌ ياخود مبارز شعرلري‌ نه‌قدر ديرسه‌، الده‌ آزدير. بو شعرلرده‌ن‌ بللي‌ اولوركي‌، شاعير صراف‌ يالنيز غزل‌ و مرثيه‌ يازماغا كفايت‌لنمه‌ميش‌ و چاغينين‌ حركت‌لرينه‌ده‌ اعتناسيز اولماميش‌ دير. صرافين‌ اَن‌معروف‌ مستزادي‌كي‌ مشروطه‌ دؤورو يازميش‌ دير بئله‌ باشلانير.
اي‌ ملت‌ اسلام‌ اويان‌ وقت‌ سحر گؤر بيرنه‌ خبردي‌
بس‌ دور بو قدر ياتما چورورسن‌ نه‌ خبردي‌ دوروقت‌ سحردي‌
غافل‌ دوشوبن‌ دينيوي‌ دونيايه‌ ساتيبسان‌ يوز ايلدي‌ ياتيبسان‌
بس‌ دور گؤزون‌ آچ‌سنده‌ كسالت‌ نه‌ خبردي‌ دوروقت‌ سحردي‌
مين‌ يئرده‌ن‌ آييلديرسني‌ بي‌چاره‌ احبّاء ترپنمميش‌ اصلا
ياتماق‌ بئله‌ اولماز بو اولومدنده‌ بتردي‌ دوروقت‌ سحردي‌
تاپديرسني‌ همسايه‌لرين‌ دورما دئيريات‌ كئچميش‌ اولا هيهات‌
بو دوره‌ده‌ هر كيمسه‌ ياتاقاني‌ هدردي‌ دوروقت‌ سحردي‌…
كريم‌ آقاصافي‌
حاج‌ جعفر دايي‌ نوه‌سي‌ عايله‌سينده‌ آنادان‌ اولان‌ كريم‌ آقا صافي‌نين‌ آدي‌ گلنده‌ نه‌ ايسه‌، ايستر ايسته‌مز نووحه‌ و مرثيه‌ ادبياتي‌ ايله‌ ياناشار. حالبوكي‌، بو شاعيرين‌ دادلي‌ - دوزلو غزللري‌ و باشقا ژانرلاردا دا شعرلري‌اولموشدور. صافي‌ روس‌ سالداتلاري‌ عاشورا گونونده‌ آذربايجانين‌ غئيرتلي‌ اوولادلاري‌ قهرمانجادار آغاجيندان‌ گوناهسيزجا آسيلديقدا بئله‌ شعر يازميشدير.
اي‌ وطنه‌ بذل‌ ائله‌ين‌ نقدجان‌ملته‌دار اوسته‌ وئره‌ن‌ امتحان‌
محو اولاموشگولدو بو نام‌ و نشان‌قانلا صفا تاپدي‌، باهار وطن‌
جانيميز اولا خوشدو نثار وطن‌
چكديلر داره‌ سيزي‌ منصور وارتاپدي‌ شرافت‌ هامي‌ يار و ديار
بسدي‌ بيزه‌ بو شرف‌ و افتخارقانلا صفا تاپدي‌، باهار وطن‌
جانيميز اولا خوشدو نثار وطن‌
كريم‌ آقا صافي‌نين‌ مبارز شعريميزه‌ شوبهه‌سيزكي‌ دانيلماز رولو اولموشدور. او قمري‌ 1353 - ينجي‌ ايل‌ 69 ياشيندا دونياسين‌ ده‌ييشميشدير.
ميرزه‌ علي‌ اكبر صابر
آذربايجانين‌ طنز شعرينين‌ آن‌ اوستون‌ و مودريك‌ نماينده‌سي‌ اولان‌ ميرزه‌ علي‌ اكبر طاهرزاده‌ (صابر) ديحجة‌ آيي‌نين‌ 28 ينجي‌ گونونده‌ شماخي‌ شهرينده‌ دونيايه‌ گلميش‌ و 51 ايل‌ آجي‌ شيرين‌ عؤمور سوردوكده‌ 329ينجي‌ ايلينين‌ رجب‌ آيي‌نين‌ 28 ينجي‌ گونونده‌ بير خسته‌ليك‌ سوردوكده‌. ياشايشين‌ آغيريوكون‌ يئره‌ قويموشدور. صابر حاقدا گونوموزه‌ قدر 100 دن‌ آرتيق‌ كيچيك‌ بويوك‌ مقاله‌ يازيليب‌ و او شاعيرين‌ ياشايشي‌، شعرطرزي‌، آچيق‌ فيكري‌ و… ذكر اولموشدور. صابرين‌ آدي‌ گلنده‌ طنزله‌ ياناشي‌ گلسه‌ده‌ مبارز شعريميزده‌ پايي‌ آز اولماميش‌ و يازيچيلارين‌ بيري‌ اونون‌ شعرلرين‌ مشروطه‌نين‌ ايره‌لي‌ سورمه‌سينده‌ نئچه‌ اوردو ايله‌ برابراولماسين‌ يازميشدير. صابرين‌ اَن‌ چئشيدلي‌ ايش‌لريندن‌ معروف‌ «موللانصرالدين‌» ژورنالي‌ ايله‌ ياخيندان‌ فيكيرداشليق‌ و امكداشليق‌ ائتمه‌سي‌ ايدي‌. اونون‌ بو ژورنالدا او قدر رولو اولدوكي‌ «صابري‌ موللا نصرالدين‌سيزو موللانصرالديني‌ ده‌ صابرسيز دوشونمك‌ چتين‌» ايشلردن‌ اولور.
اونون‌ مبارز شعريميزه‌ داير بير سيرا شعرلري‌ واركي‌، شانلي‌ مشروطه‌ چاغي‌ ظفر نغمه‌لري‌ كيمي‌ اوخونوب‌ منيمسه‌نه‌ردي‌. صابرين‌ ميللي‌ سردار ستارخانا يازديغي‌ شعريندن‌ بير بندين‌ بيرگه‌ اوخوياق‌:
آفرين‌ تبريزيان‌، ائتديز عجب‌ عهده‌ وفا
دوست‌ و دشمن‌ ال‌ چاليب‌ ائيله‌ر سيزه‌ صد مرحبا
چوخ‌ ياشا دولتلي‌ ستارخان‌ افنديم‌ چوخ‌ ياشا
جنت‌ اعلاده‌ پيغمبر سيزه‌ ائيله‌ردوعا
چون‌ بو خدمت‌لر بوتون‌ اسلامه‌ دور، انسانه‌ دور
آفرينيم‌ همت‌ والاي‌ ستارخانه‌ دير…
ميرزه‌ تقي‌خان‌ رفعت‌
چاغداش‌ شعريميزين‌ آن‌ مودريك‌ و ضيالي‌ شاعيرلريندن‌، بيريسي‌ده‌ ميرزه‌ تقي‌ خان‌ رفعت‌ ايدي‌. او گونش‌ ايلي‌ 1268 ده‌ تاريخ‌ بويلو آذربايجانين‌ چيرپينان‌ اوره‌يي‌ اولان‌ تبريز شهرينده‌ آنادان‌ اولموش‌ و گنج‌ ايكن‌هوش‌، باشين‌ عائله‌سي‌ ايله‌ هنده‌ورينده‌كي‌لره‌ بيلدير ميش‌دير. رفعت‌ آنا ديليندن‌ علاوه‌ فارسجا، و فرانسه‌ ديل‌لرينه‌ تام‌ شكيل‌ده‌ تانيش‌ بير شاعير و اديب‌ ايدي‌. او ادبياتيميزدا و تاريخيميزده‌ نئچه‌ جهت‌لي‌ اولوانسانلاردان‌ دير. شاعير، تنقيدچي‌، ژورناليست‌، انقلابچي‌كي‌ بونلارين‌ هاميسيندا اوست‌ - اوسته‌ موفق‌ بير كيمسه‌ ايدي‌. رفعت‌ توركجه‌ شعرلرينين‌ بيرينده‌ ميللي‌ قالخينمالارا داير بئله‌ بير شعر قوشموشدور.
يئنه‌ يئتدي‌ اقباليميز / حاصيل‌ اولدو آماليميز / نه‌ روشن‌ استقباليميز / ياشاسين‌ استقلاليميز / ياشاسين‌ مساوات‌ / ياشاسين‌ حريت‌/
روشن‌ ميلتين‌ گؤزلري‌ / گولسون‌ تماماً اوزلري‌ / باتدي‌ سحر اولدوزلاري‌ / گلدي‌ شرف‌ گوندوزلري‌ / ياشاسين‌ حريت‌ / ياشاسين‌ مساوات‌ /
فخر و شرف‌ مصداقيميز / روشن‌ هامي‌ آفاقيميز / آزاد اولوب‌ توپراغيميز / يايلاقيميز، قيشلاقيميز / ياشاسين‌ حريت‌ / ياشاسين‌ مساوات‌…
بو آرزي‌ گؤز شاعير گنج‌ ايكن‌ آذربايجانين‌ عاليم‌ قائدي‌ شهيد شيخ‌ محمدخياباني‌نين‌ نهضتي‌ سيناندان‌ سونرا، ياشاييشين‌ داريسقال‌ نقطه‌سينه‌ آياق‌ باسيب‌ و نهايت‌ 1299 دا حيات‌لا ويداع‌لاشير.
زونوزلو ميرزه‌ قافار سياهپوش‌
مشروطه‌ انقلابي‌نين‌ تانينميش‌ سيمالارينين‌ بيريسي‌ ده‌ زونوزلو ميرزه‌ قافار ايدي‌. او سياست‌ دن‌ علاوه‌ شعر سؤيله‌ميش‌سه‌ده‌، آنجاق‌ آدي‌ چوخ‌ بير دؤيوشچو كيمي‌ گئتميشدير. ميرزه‌ قافار 1300 هجري‌ قمري‌ ده‌زونوز قصبه‌سينده‌ آنادان‌ اولموش‌ و گونش‌ ايلي‌ 1313 ده‌ تهراندا فوت‌ ائتميشدير. او الده‌ اولان‌ آز شعرلرينده‌ «دلي‌» و «سيرتيق‌» امضالاري‌ ايله‌ دا گاهدان‌ تانينميش‌ موللا نصرالدين‌ ژورناليندا بير سيرا شعرلري‌ چاپ‌اولموشدور. شاعير ميرزه‌ قافار سياست‌دن‌ علاوه‌ گوركملي‌ واعظ‌لردن‌ ايدي‌.
تا نفس‌ وار نئي‌ كيمين‌ افغان‌ و فرياد ائيله‌ريك‌نئي‌ كيمي‌ فرياد ائديب‌ عالمده‌ بير آدا ايله‌ريك‌
آه‌ سردي‌ ايله‌ بناي‌ ظلم‌ بر باد ائيله‌ريك‌بو تلاش‌ ايله‌ وطن‌ مولكونو آباد ائيله‌ريك‌
نئي‌ سسي‌ ايله‌ ]چون‌[ گتيرديك‌ شوره‌ اهل‌ غيرتي‌ثابت‌ اولسون‌ تا جهاني‌ بي‌نوالر قدرتي‌(1)
سعيد سلماسي‌
مشروطه‌ انقلابيندا جاندان‌ مايا قويانلارين‌ اَن‌ شعورلولاريندان‌ كي‌ هم‌ شعر و هم‌ مبارزه‌ سنگرلرينده‌ قيزقينجا دويوشوردو، سالماسي‌ سعيدين‌ آدين‌ حؤرمتله‌ ياد ائتمك‌ گره‌ك‌. او 1306 قمري‌ده‌ سالماس‌ شهرينده‌آنادان‌ اولور و ائله‌ گنج‌ چاغلاريندا اؤز هوش‌ - باشين‌ و ذكاوتين‌ بللنديرير. اونون‌ اصل‌ ايشي‌ آل‌ - وئر اولموشسادا، معارف‌ پرورليك‌ده‌ن‌ گئري‌ قالمير. مدرسه‌ تيكير، چاپخانا قويور، سيد حسن‌ شريف‌زاده‌ ايله‌ بيرليكده‌روزنامه‌ چيخاردير و…
تأسف‌له‌ سعيد آرزي‌ گؤز اوْلوب‌ و مظلومجاسينا 1327 ده‌ 21 ياشلي‌ اولاراق‌ دويوش‌ سنگرلرينده‌ قهرمانجا شهيد اولور. اونون‌ فيكرينده‌ن‌ علاوه‌ شعرلري‌ده‌ مشروطه‌ده‌ ياخشي‌ رول‌ اويناميش‌ دير. سعيد ايران‌ دابيرينجي‌ دفعه‌ اولاراق‌ يئني‌ شعرين‌ تملين‌. قويدو و يئني‌ شعر اسلوبوندان‌ علاوه‌ مبارزه‌ شعرلري‌ده‌ آز - چوخ‌ الده‌ واركي‌، اؤرنگ‌ اولاراق‌ نئچه‌ بيتين‌ بيرگه‌ اوخوياق‌:
بازم‌ توئي‌ فداي‌ نگاه‌ ملول‌ توگل‌ اي‌ مدام‌ گريه‌ و افغان‌ ائده‌ن‌ وطن‌
بازم‌ چرا غريق‌ خيال‌ و تأثري‌هر شب‌ آخان‌ سرشك‌ تأثرله‌دير، نه‌ده‌ن‌
بي‌خواب‌ و بي‌حضوري‌ چشمان‌ حسرتت‌ائيلر ليال‌ عشقيمي‌ بر ياد وطن‌
اي‌ خسته‌ طبيب‌ جو، اي‌ باغ‌ خاطرات‌اي‌ سبزه‌زار شوقي‌ سوسوزدان‌ سولان‌ وطن‌
آهي‌ كه‌ از درون‌ من‌ آيد معانيش‌مقصوديميز خلاص‌ وطن‌ دير وطن‌ وطن‌
ايام‌دي‌ گذشت‌ و صباح‌ بهار ماست‌اوغروندا حاضيريك‌كي‌، ائدك‌. بذل‌ جان‌ و تن‌
سارابلي‌ واقف‌
مشروطه‌ دوورونون‌ آرزي‌ گؤزو نيسگيللي‌ شاعيرلرينده‌ن‌ سارابلي‌ واقفي‌ گوسترمك‌ اولار. او 1263 قمري‌ ده‌ ساراب‌ شهرينده‌ آنادان‌ اولموش‌ و اوشاق‌ ايكن‌ آتاسيني‌ الده‌ن‌ وئرميش‌ دير. واقف‌ مشروطه‌ حركاتينين‌باخين‌ اشتراك‌چي‌لاريندان‌ اولاراق‌، بو خصوصدا بير چوخلو شعرلر دئميشدير. اونون‌ ياشايش‌ و ياراديجيليغي‌ حاقدا تبريزده‌كي‌ ژورناليست‌ و ادبي‌ دوستوم‌ بهروز ايماني‌ گئنيش‌ بير تحقيق‌ آپارميش‌ و دئديك‌لرينه‌گؤره‌، ديوانين‌ چاپا حاضيرلاميش‌ ديركي‌، آرزي‌ ائديريك‌ اونون‌ ايشيق‌ اوزو گؤرمه‌سي‌ ايله‌ بيزيم‌ده‌ گؤزلريميز ايشيقلانسين‌.(2) اونون‌ اساس‌ يازديغي‌ شعرلر نووحه‌ و مرثيه‌ اولسادا، مبارز يا خود مقاومت‌ و باشقاژانرلرده‌ ده‌ شعرلري‌ وار. واقف‌ 1326 قمري‌ ده‌ دئمك‌ مشروطه‌ يئتيشن‌ زامان‌ دونياسين‌ ده‌يشير.
بيرده‌ چتيندي‌ شاه‌ سئوه‌ندن‌ گوه‌ون‌ گله‌ايراني‌ غارت‌ ائتمه‌يه‌ هر بين‌ گلن‌ گله‌
مشروطه‌ شرط‌ بالتاسين‌ ترسه‌ سابلادي‌آي‌ خان‌ داغيت‌ تيفاغيني‌ آي‌… چنگله‌…
واقفين‌ نوحه‌لرينده‌ن‌ ده‌ ايكي‌ بيت‌ بيرگه‌ اوخوياق‌:
دوشنده‌ وصل‌ گونو هر زمان‌ خياله‌ علي‌(ع‌)اولور خيال‌ دوشور كونلوم‌ اؤزگه‌ حاله‌ علي‌
ائديم‌ نه‌ چاره‌ نه‌ منده‌، نه‌ سنده‌ قدرت‌ واراؤپوم‌ آپاغيني‌ تا بيريئتيم‌ وصاله‌ علي‌(ع‌)…
شيروانلي‌ محمد هادي‌
آذربايجانين‌ قوزي‌ حيصه‌سينين‌ آدليم‌ و عين‌ حالدا آرزي‌ گؤز شاعيرلريندن‌ بيريسي‌ ده‌ محمد هادي‌ ايدي‌. محمد هادي‌ اوتاي‌ آذربايجاندا اولسادا آنجاق‌ اوره‌يي‌ بوتايدا اولوب‌ و بير چوخ‌ شاعيرلرله‌ مبارز شعريميزه‌دوز سالميشلار. صابرين‌ اَن‌ ياخين‌ دوستو هادي‌، محمدعلي‌ شاهين‌ ديكتاتورلوغونون‌ گؤردوكده‌ الين‌ - الينين‌ اوستونه‌ قويمايب‌ و خالق‌ آرا بو شعري‌ مشهور اولموشدور.
صحنة‌ ايراني‌ دؤندردين‌ بلا صحراسيناعزم‌ و قصد ائتدينمي‌ شاها مملكت‌ افناسينا
خانمانلار سوندو، جانلار ياندي‌، ويران‌ اولدوملك‌تيغ‌ ظولمو چكميسن‌، مظلوملارين‌ امحاسينا
گول‌ بو گون‌ ظولمونله‌ انظار عدالت‌ آغلاسين‌منتظر اول‌ انتقامين‌ رعدتك‌ فرداسينا
فيشقيران‌ خون‌ خروشان‌ شهيدان‌ دير بو گون‌سنده‌ دقيانوس‌ سن‌، حريتين‌ يحيي‌سينا
ملتي‌ بير سيل‌ اضمحلال‌ استقبال‌ ائديررحيم‌ قيل‌ ايران‌ زمينين‌ جنت‌ رعناسينا…
اساس‌ قايناقلار و ايضاحـلار:
1- باياتيلار / م‌.ع‌. فرزانه‌.
2- ستارخان‌ / محمدرضا عافيت‌.
3- حيدر عمي‌ اوغلو / م‌.ع‌. شميده‌.
4- صمد بهرنگي‌نين‌ مقاله‌لري‌.
5- زنان‌ ايران‌ در جنبش‌ مشروطه‌ / عبدالحسين‌ ناهيد / تبريز. ص‌. 5.
6- آذربايجان‌ روزنامه‌سي‌ 27 آذر 1320.
7ـ مشاهير آذربايجان‌ / صمد سرداري‌نيا.
8ـ دلريشين‌ شعر ديواني‌ / تبريزلي‌ محمدعلي‌ طبيب‌ محمد جواد اوغلونون‌ خطي‌ ايله‌، تبريز 1329 قمري‌ - دلريشين‌ ياشايشي‌ اوچون‌ باخين‌: اختر هفته‌لييي‌، تهران‌ - سايي‌، تاريخ‌ 2/2/81 تبريزلي‌ دلريش‌، رضا همراز
9ـ اولكر ژورنالي‌، تبريز خرداد 1360، نومره‌ ايكي‌، مقاله‌، م‌. نقابي‌
10ـ فجر آذربايجان‌ گونده‌لييي‌، يكشنبه‌ 14/9/74 توركجه‌ صحيفه‌، تبريزلي‌ حقيقت‌، رضا همراز
11ـ شمس‌ تبريز، هفته‌لييي‌، ارديبهشت‌ آيي‌، اؤزل‌ سايي‌، سؤزمولكونون‌ صرافلاريندان‌، يازار، رضا همراز
12ـ وارليق‌ ژورنالي‌، آذربايجان‌ و مكتب‌ تجدد، 78 اينجي‌ ايل‌ مقاله‌ بو سطرلرين‌ يازاري‌نين‌ قلمي‌ ايله‌
13ـ انجمن‌ ژورنالي‌ / شوماره‌ 138، هفته‌ اوچو 14 شعبان‌ 1325، تبريز
14ـ مهد آزادي‌ گونده‌لييي‌، آذر صحيفه‌سي‌، اوستاد يحيي‌ شيدا
15ـ مولانصرالدين‌ ژورنالي‌، اوچونجو ايل‌، نومره‌ 10 (بو قايناغي‌ حورمتلي‌ شاعير دوستوموز رضا غفاري‌ عنايت‌ ائتميشلركي‌ تشكر ائديريك‌)
16ـ ميرزه‌ جعفر خامنه‌اي‌نين‌ اليازما شعر ديواني‌ خامنه‌يي‌نين‌ ياشايشي‌ و ياراديجيليغي‌ اوچون‌ باخين‌ يئني‌ شعريميزين‌ ائلچي‌لرينده‌ن‌، ميرزه‌ جعفر خامنه‌اي‌، رضا همراز - شمس‌تبريز، 25 مهر 80
17ـ هوپ‌، هوپ‌ نامه‌ كامل‌ مصور / ع‌. صابر / علي‌ اسكندر جعفرزاده‌، ع‌. صحت‌ و محمد سعيد اوردوبادي‌نين‌ مقدمه‌ و ايضاحلاري‌ / باكي‌.
18ـ ميرزه‌ قافارين‌ ادبي‌ امضالارين‌ حؤرمتلي‌ شاعير دوستوموز بهرام‌ ائلچين‌ بيزه‌ بللنديرميشلركي‌، تشكر ائديريك‌.
19ـ واقف‌ حاقداكي‌ شعر و معلوماتي‌ عزيز دوستوم‌ بهروز ايماني‌ بيزه‌ لطف‌ ائتميش‌لركي‌ يئرلي‌ دير اؤز ممنونيتيميزي‌ بيلديره‌ك‌.